நீங்கள் தேடியது "ஆருத்ரா தரிசனம்"

ஆனி திருமஞ்சனம் மற்றும் ஆருத்ரா தரிசனத்தின்போது நடராஜர் வீதி உலா வந்து பக்தர்களுக்கு அருள்பாலிப்பார். அதன்படி மார்கழி மாதம் நடைபெறும் ஆருத்ரா தரிசன விழா நேற்று நடந்தது. வேலூர் கோட்டையில் உள்ள ஜலகண்டேஸ்வரர் கோவிலில் ஆருத்ரா தரிசன விழாவையொட்டி நேற்று முன்தினம் மாலை நடராஜருக்கு அபிஷேகம், அர்ச்சனை, தீபாராதனை நடந்தது.

நேற்று அதிகாலை கோவில் நடை திறக்கப்பட்டு, நடராஜருக்கு பல்வேறு வாசனை திரவியங்களால் சிறப்பு அபிஷேகம் மற்றும் ஆராதனை நடந்தது. அதைத்தொடர்ந்து 6 மணிக்கு நடராஜர், சிவகாமசுந்தரி அம்மன் கோபுர தரிசனம் நடந்தது.

பின்னர் சாமி திருவீதி உலா நடந்தது. பக்தர்கள் திருவெம்பாவை பாடல் பாடினார்கள். இதில் ஏராளமான பக்தர்கள் கலந்து கொண்டனர்.

ஏற்பாடுகளை ஜலகண்டேஸ்வரர் கோவில் தரும ஸ்தாபனத்தினர் செய்திருந்தனர்.

வேலூர் சுக்கையா வாத்தியார் தெருவில் உள்ள காசிவிஸ்வநாதர் கோவிலிலும் ஆருத்ரா தரிசன விழா நேற்று நடந்தது. அதிகாலை கோவிலில் உள்ள சிவகாமசுந்தரி சமேத காசி விஸ்வநாதருக்கும், நடராஜருக்கும் விசேஷ அபிஷேகம், ஆராதனை நடந்தது. பின்னர் 6 மணிக்கு கோபுர தரிசனமும், சாமி திருவீதி உலாவும் நடந்தது. இதில் திரளான பக்தர்கள் கலந்து கொண்டனர்.

இதேபோல் மாவட்டத்தில் உள்ள அனைத்து சிவன் கோவில்களிலும் ஆருத்ரா தரிசன விழா நடந்தது. இதில் திரளான பக்தர்கள் கலந்து கொண்டு சாமி தரிசனம் செய்தனர்.

கடலூர் மாவட்டம் சிதம்பரத்தில் உள்ள உலக புகழ்பெற்ற நடராஜர் கோவிலில் ஆருத்ரா தரிசன விழா கடந்த 14-ந் தேதி கொடியேற்றத்துடன் தொடங்கியது.

விழாவின் முக்கிய நிகழ்ச்சியில் ஒன்றான தேரோட்டம் நேற்று முன்தினம் நடந்தது. இதில் ஆருத்ரா தரிசனம் தருவதற்காக மூலவர் நடராஜர், சிவகாமசுந்தரி அம்பாள் மற்றும் விநாயகர், சுப்பிரமணியர், சண்டிகேஸ்வரர் ஆகியோர் தனித்தனி தேரில் எழுந்தருளினர். ஏராளமான பக்தர்கள் கலந்துகொண்டு தேரை வடம் பிடித்து இழுத்தனர்.

தொடர்ந்து சிகர நிகழ்ச்சியான ஆருத்ரா தரிசனம் நேற்று அதிகாலை 2 மணி முதல் தொடங்கியது. அப்போது ஆயிரங்கால் மண்டபத்தில் சிவகாமசுந்தரி சமேத நடராஜருக்கு மகா அபிஷேகம் நடந்து, திருவாபரண அலங்கார காட்சி நடைபெற்றது.

பின்னர் காலை 10 மணிக்கு சித்சபையில் ரகசிய பூஜை நடந்தது. தொடர்ந்து மதியம் 1.25 மணி அளவில் பஞ்ச மூர்த்திகள் வீதி உலா வந்து ஆயிரங்கால் முகப்பு மண்டபம் முன்பு காட்சி கொடுத்தனர்.

இதையடுத்து மாலை 4 மணி அளவில் ஆயிரங்கால் மண்டபத்தில் இருந்து மூலவர் நடராஜரும், சிவகாமசுந்தரி அம்பாளும் பல்லக்கில் எழுந்தருளி சித்சபைக்கு புறப்பட்டனர். அதில் பல்லக்கில் ஆடல் அரசன் நடராஜர் நடன பந்தலில் முன்னும் பின்னும் அசைந்தாடியபடி தரிசனம் அளித்த கண்கொள்ளா காட்சி அனைவரையும் மெய்சிலிர்க்க வைத்தது.

அந்த சமயத்தில் பெய்த மழையையும் பொருட்படுத்தாமல், அங்கு திரண்டிருந்த பல ஆயிரக்கணக்கான பக்தர்கள் மழையில் நனைந்தபடியே பக்தி கோஷங்களை எழுப்பி நடராஜரை தரிசித்தனர். இதையடுத்து மாலை 4.15 மணி அளவில் நடராஜர், சிவகாமசுந்தரி அம்பாள் கோவில் உட்பிரகாரத்துக்கு வந்தனர். அங்கு கருவறையில் வைத்து சாமிக்கு சிறப்பு பூஜை நடந்தது.

வழக்கமாக தரிசனம் மதிய நேரத்திலே நடந்து முடிந்துவிடும். அதே போல் இந்த முறையும் 2 மணி அளவில் நடைபெறும் என்று தெரிவிக்கப்பட்டு இருந்தது. ஆனால் தாமதமாக மாலை 4.15 மணி அளவில் தான் நடராஜரின் தரிசனத்தை பக்தர்கள் பெற முடிந்தது.

விழாவில் இன்று (திங்கட்கிழமை) பஞ்சமூர்த்திகள் முத்துப்பல்லக்கு வீதிஉலா காட்சியும், நாளை (செவ்வாய்க்கிழமை) தெப்ப உற்சவமும் நடக்கிறது. அத்துடன் ஆருத்ரா தரிசன விழா நிறைவுபெறுகிறது. 

திருவண்ணாமலை அருணாசலேஸ்வரர் கோவிலுக்கு தினமும் ஆயிரக்கணக்கான பக்தர்கள் வந்து சாமி தரிசனம் செய்து விட்டு செல்கின்றனர். பெரும்பாலான பக்தர்கள் நகரின் மையப் பகுதியில் உள்ள மலையை சுற்றி சுமார் 14 கிலோ மீட்டர் கிரிவலம் செல்கின்றனர்.

இந்த நிலையில் மார்கழி மாதத்துக்கான பவுர்ணமி கடந்த 21-ந் தேதி நள்ளிரவு சுமார் 1.30 மணிக்கு தொடங்கி நேற்று முன்தினம் இரவு 12 மணிக்கு நிறைவடைந்தது. இதனை முன்னிட்டு நேற்று முன்தினம் இரவு பல்லாயிரக்கணக்கான பக்தர்கள் கிரிவலம் சென்றனர். நேற்று காலையும் ஏராளமானோர் கிரிவலம் சென்ற வண்ணம் இருந்தனர்.

மார்கழி மாதம் திருவாதிரை நட்சத்திரத்தன்று சிவன் கோவில்களில் ஆருத்ரா தரிசன விழா நடைபெறும். அதன்படி நேற்று திருவண்ணாமலை அருணாசலேஸ்வரர் கோவிலில் ஆருத்ரா தரிசனம் நடந்தது.

இதனை முன்னிட்டு நேற்று முன்தினம் இரவு கோவிலில் 5-ம் பிரகாரத்தில் உள்ள ஆயிரங்கால் மண்டபத்தில் சிவகாமி சுந்தரி சமேத நடராஜர் சிறப்பு அலங்காரத்தில் எழுந்தருளி பக்தர்களுக்கு அருள்பாலித்தார். நேற்று காலை சிவகாமி சுந்தரி சமேத நடராஜருக்கு பால், தயிர், சந்தனம் உள்ளிட்ட பல்வேறு திரவியங்களால் சிறப்பு அபிஷேகம் நடந்தது. பின்னர் சிறப்பு அலங்காரத்தில் சிவகாமி சுந்தரி சமேத நடராஜருக்கு தீபாராதனை நடந்தது.

தொடர்ந்து கடந்த மாதம் 23-ந் தேதி மகா தீபத்தன்று 2 ஆயிரத்து 668 அடி உயர மலைஉச்சியில் ஏற்றப்பட்ட மகா தீப கொப்பரையில் இருந்து பெறப்பட்ட தீப மை, நடராஜருக்கு அணிவிக்கப்பட்டது. இதில் திரளான பக்தர்கள் கலந்து கொண்டு சாமி தரிசனம் செய்தனர். தொடர்ந்து திருமஞ்சன கோபுரம் வழியாக நடராஜர் மாடவீதியில் வலம் வந்து பக்தர்களுக்கு அருள்பாலித்தார்.

தீப மை பிரசாதம் 5 நாட்களுக்கு பிறகு பக்தர்களுக்கு வழங்கப்படுகிறது. நெய் காணிக்கை செலுத்திய பக்தர்கள் அதற்கான ரசீதுகளை காண்பித்து, கோவில் நிர்வாக அலுவலகத்தில் தீப மை பெற்றுக்கொள்ளலாம் என்று கோவில் அதிகாரிகள் தெரிவித்தனர்.

கீழ்பென்னாத்தூரில் பழமை வாய்ந்த மீனாட்சி சுந்தரேஸ்வரர் கோவிலில் உள்ள நாட்டிய வடிவிலான நடராஜர் சாமிக்கு பல்வகை வாசனை திரவியங்களால் சிறப்பு அபிஷேகம், ஆராதனை நடந்தது. சாமிக்கு சிறப்பு அலங்காரம் செய்யப்பட்டு தீபாராதனை நடந்தது. இதில் திரளான பக்தர்கள் கலந்து கொண்டு சாமி தரிசனம் செய்தனர். மேலும் கோவிலில் வீற்றிருக்கும் லிங்க வடிவிலான ஈஸ்வரருக்கும் சிறப்பு அபிஷேக, ஆராதனை, தீபாராதனை நடந்தது.

ஆருத்ரா தரிசனம் அனைத்து நடராஜர் கோயில்களிலும் சிறப்பாக கொண்டாடப்பட்டாலும் உலகெங்கிலும் உள்ள மக்கள் ஆருத்ரா தரிசனம் செய்ய சிதம்பர நடராஜர் கோயிலுக்குத்தான் வருவார்கள்.. இந்நாளில் இத்தலத்தில் உள்ள நடராஜர் ஆருத்ரா தரிசனம் மிகவும் விசேஷம். இந்நாளில் தான் சிவப்பெருமான் ருத்ரதாண்டவம் ஆடினார்.

தாருகாவனம் என்ற வனத்தில் தவ வலிமை கொண்ட முனிவர்கள் 4 வேதங்கள், 6 சாஸ்திரங்கள் கற்று அதன்படி தங்களுடைய பணிகளை செய்துவந்தார்கள். அவர்களுக்கு உலகைக் கட்டி ஆளும் ஈஸ்வரனைப் பற்றிய எண்ணம் இல்லாமல் இருந்தது.அவர்களுக்கு ஈஸ்வரத் தியானத்தை உண்டாக்க வேண்டும் என்று நினைத்த சிவன்,திருமாலை அழைத்து அம்முனிவர்களை நல்வழிப்படுத்த வேண்டும் என்றார். திருமாலும் அதற்கு சம்மதித்து முனிவரை மயக்கும் வகையில் அழகிய பெண்ணாக உருவெடுத்து சென்றார். சிவப்பெருமானும் பிச்சை எடுப்பவராக வேடம் தரித்து நந்தியையும் உடனழைத்துக்கொண்டு சென்றார்.

வனத்துக்குள் வந்ததும் நந்தியை ஓரிடத்தில் அமரச் செய்து முனிவர்களின் குடில்களுக்குச் சென்று பிச்சை எடுப்பது போல் சுற்றிக்கொண்டிருந்தார். பரம் பொருள் எம்பெருமானாகிய சிவபெருமான் அந்த வேடத்திலும் அழகில் குறையின்றி இருந்தார். அவரைக் கண்ட முனிவர்களின் மனைவிகள் அவர் மேல் மோகம் கொண்டு அவரையே சுற்றி வந்தார்கள். மறுபுறம் திருமாலின் பெண் வேடத்தில் மயங்கிய இளம் முனிவர்கள் அவள் பின்னாலேயே சுற்றி வந்தனர்.

தங்களின் தவ நிலை கலையாத வயது முதிர்ந்த முனிவர்கள் கோபம் கொண்டு அப்பெண்ணையும் அவள் பின்னால் சுற்றிய இளம் முனிவர்களையும்,பிச்சை வேடம் தரித்தவரையும் அக்னியில் அழிக்க ஹோமத்தை வளர்த்தனர். ஹோமத்திலிருந்து முதலில் புலி ஒன்று பாய்ந்து வந்தது. பிச்சை வேடம் தரித்து வந்த சிவப்பெருமான் அப்புலியை தன் நகங்களாலேயே இரண்டாக பிளந்து ஆடையாக்கி கொண்டார். அடுத்ததாக விஷம் கொண்ட பாம்புகள் சீறிப் பாய்ந்தன.சிவப்பெருமானின் அக்னி பார்வையில் அவை சிவனுக்கு அணிகலனாகின.

இதைக் கண்ட முனிவர்கள் ஆக்ரோஷத்துடன் முன்னிலும் தீவிரமாக யாகம் செய்து அபஸ்மாரம் என்ற பூதத்தை ஏவினர். ஓடி வந்த பூதத்தை வலதுகாலுக்கு அடியில் வைத்து சிவபெருமான் ஏறி நின்றார். இனி எதுவும் ஏவுவதற்கு இல்லை என்ற முனிவர்கள் ஹோம அக்னியையே ஏவினார்கள். சிவபெருமானோ அதை இடக்கையில் ஏந்தினார்.

கடைசி ஆயுதமாக வேத மந்திரங்களை ஏவினர் முனிவர்கள். அவற்றை சிலம்பாக மாற்றி தன் பாதத்தில் அணிந்து கொண்டார். இனி எதைக் கொண்டு வெல்வது என்று திணறிய முனிவர்களின் முன் தன்னுடைய சடைமுடி எட்டுத்திக்கிலும் விரிந்தாட கோபாவேசத்துடன் அண்டங்கள் எல்லாம் குலுங்க குலுங்க தாண்டவமாடினார் சிவப்பெருமான்.சர்வத்தையே காக்கும் சர்வேஸ்வரனிடமா போர்புரிகிறோம் என்று ஈசனின் காலில் விழுந்து மன்றாடினார்கள். அவர்கள் வேண்டுகோளை ஏற்ற சிவபெருமான் ருத்ரதாண்டவத்தை ஆனந்த தாண்டவமாக மாற்றி அருள்புரிந்தார்.

திருவாதிரை நாளன்று சிவபெருமான் நடேசனாக மாறி திருத்தாண்டவம் ஆடியதால் மகிழ்ச்சியில் உலவினார். பாற்கடலில் மகாவிஷ்ணு மகிழ்ச்சியில் திளைக்க என்ன காரணம் என்று ஆதிசேஷன் கேட்டார். சிவபெருமானின் தாண்டவத்தைப் பற்றி பரந்தாமன் சொன்னதும் தானும் அதைக் காண வேண்டும் என்று ஆதிசேஷன் ஆவல் கொள்ள பெருமாளும் ஆசியளித்தார்.

பாதி முனிவராகவும், பாதி பாம்பாகவும் பதஞ்சலி முனிவராக உருக்கொண்டு பூலோகம் வந்து தவம்புரிந்தார். தவத்தில் மகிழ்ந்த சிவபெருமான் அவர் முன் தோன்றி,உம்மை போலவே வ்யாக்ரபாதரும் என் திருநடனம் காணவேண்டி விரும்புகிறார். நீங்கள் இருவரும் தில்லையில் என் நடனத்தைக் கண்டு மகிழ்வீராக என்று கூறி மறைந்தார். சிதம்பரம் திருத்தலத்தில் தில்லை அம்பல நடராஜரின் திருநடனத்தை திருவாதிரை திருநாளில் கண்டனர். அதனால் தான் மார்கழி திருவாதிரை தினத்தன்று விரதம் இருந்து சிவாலயம் சென்று நடராஜரைத் தரிசனம் செய்தால் நமது பாவங்கள் விலகி புண்ணியம் கிடைக்கும் என்கின்றன புராணங்கள்.

வைகை என்னும் பொய்யா குலக்கொடி-வேகவதி-புலவர் நாவில் பொருந்திய பூங்கொடி இவ்வாறு அன்று வாழ்ந்த தமிழ் புலவர்களால் புகழ்ந்து பாடப்பட்டது வைகை ஆற்றின் முகத்துவாரமான ராமநாதபுரம். இங்கு மகுடமாக அமைந்திருப்பது திருஉத்தரகோசமங்கை திருத்தலம். இலக்கிய சிறப்பும், இதிகாச பெருமையும் கொண்டு விளங்கும் இந்த திருஉத்தர கோசமங்கை, தொல்காப்பிய காலத்துக்கு முந்தைய தொன்மை வாய்ந்தது.

இந்து மத வேதங்களிலும் புராணங்களிலும் உலகில் சிவபெருமான் உறையும் முதல் திருத்தலம் இதுதான் என்று வர்ணிக்கப்படுகிறது. இதன் காரணமாக இந்தகோவில் ஆதிசிதம்பரம், பூலோக கைலாயம், சிற்றம்பலம், பொன்னம்பலம் என்றெல்லாம் புகழ்ந்து போற்றப்படுகிறது. இந்த புண்ணிய தலமான திருஉத்தரகோசமங்கை ராமநாதபுரத்தில் இருந்து தென்மேற்கே 10 மைல் தொலைவில் உள்ளது.

உயர்ந்து நிற்கும் கோபுரம், மாட வீதிகள், மணிமண்டபங்கள், எழிற்கூடங்கள், நீண்ட நெடிய தாழ்வாரங்களுடன் கண்ணைக்கவரும் வகையில் காட்சி தருகிறது. மண்எட்டும் புகழ் பரப்பும், விண் எட்டும் கோபுர விமானம், கர்ப்ப கிரகம் அன்றைய தமிழர்களின் நுண்ணிய கலைத்திறனுக்கு எடுத்துக்காட்டாக திகழ்கிறது. தமிழ் வளர்த்த சமயக்குரவர்கள் நால்வர்களில் ஒருவரான மாணிக்க வாசகர் அவருடைய தெய்வீக பாடல்களில் ‘மண் முந்தியோ மங்கை (திரு உத்தரகோசமங்கை) முந்தியோ’ என்று பாடல்களில் குறிப்பிட்டு கூறுவதில் இருந்து இந்த ஊர் பிரபஞ்சத்தின் முதல் பூபாகம் என்று உறுதிபட நம்புகிறார்கள்.

இந்த திருத்தலத்தின் வேதகால புராண நிகழ்வுகளும், இறைவனின் திருவிளையாடல்களும் இந்த உத்தரகோசமங்கை மண்ணில்தான் நடைபெற்றுள்ளன என்று இந்து சமய ஆன்மிக அறிஞர்கள் உறுதிபட நம்புகிறார்கள்.இந்த கோவிலில் உள்ள சிவலிங்கம் சுயம்புவாக உருவானது. ராமபிரானின் மூதாதையர்களினால் உருவாக்கப்பட்ட இந்த கோவில் பகுதியில் முனிவர்களும், ரிஷிகளும் தங்கி இறைவனை வழிபட்டதாக வேத வரிகளில் காணப்படுகின்றன. இறை வழிபாட்டை துறக்காத 1000 முனிவர்கள் சிவபெருமானை துதிக்கவும், தவம் செய்யவும் இந்த இடத்தை தான் தேர்வு செய்தார்கள்.

புராண புகழ்பெற்ற இந்த கோவிலின் தல விருட்சம் இலந்தை மரம் பல்லாயிரக்கணக்கான ஆண்டுகளுக்கு முற்பட்டது என்று ஆய்வாளர்கள் அறிவித்துள்ளனர்.

இந்த கோவிலின் நவரத்தினங்களில் ஒன்றான பச்சை மரகத கல்லினால் ஆன ஆளுயர ஆடும் திருக்கோலத்தில் உள்ள விலை மதிக்க முடியாத அபூர்வ நடராஜர் சிலை உள்ளது. தமிழர்களின் கலைத்திறனுக்கும் நுண்ணிய சிற்ப வேலைப்பாடுகளுக்கும், கட்டியம் கூறும் வகையில் கண்கவர் காட்சியளிக்கும் அபூர்வ சிலை இது. நவரத்தினங்களில் ஒன்றான பச்சைக்கல் இயல்பாகவே மென்மையானது.

ஒளி, ஒலி அதிர்வுகளை தாங்க முடியாத தன்மை உடையது. இதன் காரணமாக மத்தளம் முழங்க மரகதம் உடைபடும் என்று சொல்வார்கள். எனவே இந்த நடராஜர் சிலையை ஒளி, ஒலி அதிர்வுகளில் இருந்து பாதுகாக்க சந்தனக்கலவையை பூசி வருகிறார்கள். வருடத்தில் ஒருநாள் அதுவும் சிவனுக்கு உகந்த நாளான திருவாதிரை நாளில் மட்டும் பக்தர்களின் தரிசனத்திற்காக சந்தனக்கவசம் களையப்படும்.

இதன்படி ஆருத்ரா தரிசனத்தையொட்டி இன்று(சனிக்கிழமை) காலை சந்தனம் களையும் அற்புத நிகழ்ச்சி 10.30 மணிக்கு மேல் நடைபெறுகிறது. காலை 11.30 மணி முதல் அபூர்வ மரகத நடராஜருக்கு 21 வகையான அபிஷேகங்கள் நடைபெற்று சந்தனாதி தைலம் பூசப்படும். தொடர்ந்து பக்தர்களின் தரிசனத்திற்கு மரகத நடராஜர் வைக்கப்பட்டு இரவு 11.30 மணிக்கு ஆருத்ரா மகா அபிஷேகம் நடைபெறும். நாளை (ஞாயிற்றுக்கிழமை) அதிகாலை 4 மணிக்கு ஆருத்ரா அன்று மீண்டும் சந்தனக்காப்பு பூசப்படும்.

இதன் தொடர்ச்சியாக மகா தீபாராதனை நடத்தப்பட்டு அருகில் உள்ள கல்தேர் மண்டபத்தில் கூத்தர்பெருமான் எழுந்தருளும் ஆருத்ரா நிகழ்ச்சி நடைபெறுகிறது. இந்த ஆருத்ரா தரிசன விழாவில் ராமநாதபுரம் மற்றும் தமிழகத்தின் பல்வேறு பகுதிகளில் இருந்து ஆயிரக்கணக்கான பக்தர்கள் விடிய விடிய வந்து அபூர்வ மரகத நடராஜரை தரிசனம் செய்வார்கள். விழாவிற்கான ஏற்பாடுகளை ராமநாதபுரம் சமஸ்தானம் தேவஸ்தானம் ராணி பிரம்மகிருஷ்ண ராஜராஜேஸ்வரி நாச்சியார் உத்தரவின்பேரில் திவான் பழனிவேல் பாண்டியன், சரக பொறுப்பாளர் ராமு ஆகியோர் செய்து வருகின்றனர். 

மார்கழி மாதம் மிகவும் அற்புதமான மாதம் ஆகும். வைணவர்களின் வைகுண்ட ஏகாதசியும், சைவர்களின் ஆருத்ரா தரிசனமும் திருவெம்பாவை முழக்கமும் இந்த மாதத்தின் மகிமையை அதிகரிக்க செய்யும். மார்கழி மாதமானது தட்சணாயனத்தின் கடைசி மாதமாகும். தட்சணாயனம் என்பது ஆடி முதல் மார்கழி வரை உள்ள 6 மாதத்தை குறிக்கும். இது தேவர்களுக்கு இரவு காலமாகும்.

தை முதல் ஆனி மாதம் வரை உள்ள 6 மாத காலத்தை உத்தரணாயனம் காலம் என்பார்கள். உத்தரணாயனம் என்பது தேவர்களுக்கு பகல் காலமாகும். அந்த வகையில் பார்த்தால் மனிதர்களாகிய நமக்கு ஒரு வருடமானது தேவர்களுக்கு ஒரு நாளாகும். அதன்படி இரவு காலத்தின் கடைசி நேரமான அதிகாலை நேரமாக தேவர்களுக்கு மார்கழி மாதம் அமைகிறது.

அதாவது சூரியன் உதிப்பதற்கு முன்புள்ள 2 நாழிகை நேரமே தேவர்களின் அதிகாலை நேரமாகும். இந்த 2 நாழிகை நேரத்தை பிரம்ம முகூர்த்த நேரம் என்று சொல்வார்கள். இந்த நேரத்தில்தான் நடராஜரை தரிசிக்க சிவாலயங்களில் தேவர்கள், முனிவர்கள், ரிஷிகள், சித்த புருஷர்கள் ஒன்று கூடுவதாக ஐதீகம் உண்டு. அந்த அதிகாலையில் இறைவன் கண்விழித்ததும் முதல் ஆராதனையை தேவர்கள் செய்வார்கள்.

அந்த நேரத்தில் நாமும் ஆலயங்களுக்கு சென்று வழிபாடு செய்தால் இறைவனின் அருளை மிக மிக எளிதாக பெற முடியும். இதை கருத்தில் கொண்டுதான் தமிழ்நாடு முழுவதும் பழமையான ஆலயங்களில் மார்கழி மாதம் மட்டும் அதிகாலையிலேயே பூஜையை நடத்தி விடுவார்கள். 6 கால பூஜை நடக்கும் ஆலயங்களில் கூட இந்த அதிகாலை பூஜை கூடுதலாக நடத்தப்படும். அந்த அளவுக்கு மார்காழி மாத அதிகாலை பூஜைக்கு சிறப்புகள் உண்டு.

திருவண்ணாமலை தலத்தில் பொதுவாக அதிகாலை 5 மணிக்குதான் நடை திறப்பார்கள். ஆனால் மார்கழி மாதம் 30 நாட்களும் அதிகாலை 3 மணிக்கே நடை திறந்து விடுவார்கள். 3.30 மணி முதல் 5.30 மணி வரை கோ பூஜை, பள்ளியறை பூஜை, நித்திய பூஜை, அபிஷேகம், ஆராதனைகள் நடைபெறும். இந்த பூஜையில் பங்கேற்றால் மிக சிறந்த பலன்களை பெற முடியும்.

அதுபோல மார்கழி மாதம் நடைபெறும் திருவாதிரை விழாவும் மிகவும் சக்தி வாய்ந்தது. திருவண்ணாமலையில் திருவாதிரை நட்சத்திரத்தை முன்னிட்டு மாணிக்கவாசக சுவாமிகளுக்கு 10 நாள் திருவிழா திருவெம்பாவை திருவிழாவாக நடத்தப்படுகிறது. இந்த ஆண்டுக்கான திருவிழா கடந்த 14-ந்தேதி தொடங்கியது. இன்று (வியாழக்கிழமை) 7-வது நாள் திருவெம்பாவை திருவிழா நடைபெறுகிறது.

வருகிற ஞாயிற்றுக்கிழமை (23-ந்தேதி) திருவெம்பாவை திருவிழாவின் இறுதி நாள் விழாவான ஆருத்ரா தரிசனம் நிகழ்ச்சி நடைபெறும். மார்கழி மாதம் பவுர்ணமி தினத்தன்று திருவாதிரை நட்சத்திரத்துடன் கூடிய நாளில் சிவபெருமான் ஆனந்த கூத்தாடி பக்தர்களுக்கு அருள்பாலிப்பார் என்ற அடிப்படையில் இந்த விழா நடத்தப்படுகிறது.

திருவண்ணாமலையில் நடைபெறும் இந்த 10 நாள் திருவிழாவுக்கு மாணிக்கவாசக திருவிழா என்ற பெயரும் உண்டு. 10-ம் நூற்றாண்டில் வாழ்ந்த மாணிக்கவாசகர் திருவெம்பாவை திருப்பள்ளி எழுச்சி இரண்டையும் திருவண்ணாமலை தலத்தில் இயற்றினார். 20 பாடல்கள் கொண்ட திருவெம்பாவை, 10 பாடல்கள் கொண்ட திருப்பள்ளி எழுச்சியை அவர் இயற்றி அருளிய இடம் இப்போதும் கிரிவலம் செல்லும் பாதையில் அமைந்து உள்ளது. அந்த இடத்தில் மாணிக்க வாசக சுவாமிகளுக்கு சிறு ஆலயம் அமைத்து உள்ளனர்.

இதனால்தான் திருவண்ணாமலை தலத்தில் ஆருத்ரா தரிசன நிகழ்ச்சிக்கான 10 நாள் உற்சவம் மாணிக்கவாசகர் திருவிழாவாக கொண்டாடப்படுகிறது. இந்த 10 நாட்களில் முதல் 9 நாட்கள் தினமும் திருவண்ணாமலை ஆலயத்துக்குள் மாணிக்கவாசகருக்கு சிறப்பு செய்யப்படும். அண்ணாமலையார் ஆலயத்தின் இரண்டாம் பிரகாரத்தில் நடராஜர் சன்னதி அமைந்து உள்ளது. அந்த சன்னதிக்கு நேர் எதிரில் மாணிக்கவாசகர் வீற்றிருக்கிறார். விழா நடக்கும் 9 நாட்களும் நடராஜருக்கும், மாணிக்கவாசக பெருமானுக்கும் சிறந்த முறையில் அலங்காரம் செய்து பூஜை செய்வார்கள்.

நடராஜர் சன்னதியை ஒரு சிவாச்சாரியாரும், மாணிக்கவாசகர் இருக்கும் இடத்தில் மற்றொரு சிவாச்சாரியாரும் நின்று ஒருமித்த நேரத்தில் தீபாராதனை செய்வார்கள். பிறகு மாணிக்கவாசகரை நடராஜர் சன்னதி முன்னே எழுந்தருள செய்வார்கள். அப்போது திருவெம்பாவை பாடல்கள் பாடப்படும். ஒவ்வொரு திருவெம்பாவை பாடல்களை பாடியதும் நடராஜருக்கும், மாணிக்கவாசகருக்கும் தீபாராதனை காட்டப்படும். இவ்வாறு இருபது திருவெம்பாவை பாடலுக்கும் 20 தடவை தீபாராதனை காட்டுவார்கள். இந்த காட்சி கண்கொள்ளா காட்சியாக இருக்கும். அதன்பிறகு மாணிக்கவாசகர் வீதிஉலாவுக்கு புறப்பட்டு செல்வார்.

மாணிக்கவாசகர் திருவிழா நடைபெறும் 10 நாட்களும் காலையிலும், மாலையிலும் மாணிக்கவாசகர் வீதிஉலா வந்து பக்தர்களுக்கு அருள்பாலிப்பார். 9-வது நாள் இரவு (22-ந்தேதி) நடராஜரும், மாணிக்கவாசகரும் ஆயிரங்கால் மண்டபத்துக்கு எழுந்தருள்வார்கள். மறுநாள் காலை நடராஜருக்கு ஆருத்ரா சிறப்பு அபிஷேகங்கள் நடைபெறும். இந்த அபிஷேகத்தை நேரில் பார்ப்பது பிறவிப்பிணிகளை நீக்க செய்யும். முக்தி பெறுவதற்கு எளிதான வழிவகைகள் உண்டாகும்.

அந்த அபிஷேக ஆராதனை முடிந்ததும் நடராஜர் திருமஞ்சன கோபுர வாசல் வழியாக திருவீதி உலாவுக்கு புறப்பட்டு செல்வார். உலா முடிந்ததும் மீண்டும் திருமஞ்சன கோபுர வாசல் வழியாக ஆலயத்துக்கு திரும்புவார்.

பொதுவாக திருவண்ணாமலை தலத்தில் அண்ணாமலையார், உண்ணாமலை அம்மன் உள்பட அனைத்து கடவுள்களும் திருவீதி உலாவுக்கு புறப்பட்டு வரும்போது ராஜகோபுரம் வழியாக வர மாட்டார்கள். ராஜகோபுரம் அருகில் உள்ள திட்டி வாசல் வழியாகத்தான் திருவீதி உலா வருவார்கள். ஆனால் நடராஜர் அந்த வழியையும் தவிர்த்து விட்டு திருமஞ்சன கோபுர வாசல் வழியாக சென்று வருவது குறிப்பிடத்தக்கது.

மார்கழி மாதம் ஆலயத்துக்கு சென்று வழிபடுவதில் ஒரு சிறப்பு உண்டு. மற்ற மாதங்களில் வழிபாடு செய்தால்தான் பலன் கிடைக்கும். ஆனால் மார்கழி மாதம் வெறுமனே தரிசனம் செய்தாலே போதும் பலன்கள் கிடைத்து விடும் என்பார்கள். எனவேதான் நடராஜருக்கு நடத்தப்படும் ஆருத்ரா தரிசனம் முக்கியத்துவம் பெறுகிறது.

மார்கழி மாதத்தில் ஆலயங்களுக்கு செல்பவர்கள் திருப்பாவை, திருவெம்பாவை பாடல்களை பாடினால் அளவு கடந்த புண்ணியத்தை சேர்த்துக் கொள்ள முடியும். மோட்ச நிலைக்கு செல்ல விரும்புபவர்கள் திருவெம்பாவை பாடல்கள் மூலம் அதை பெற முடியும். மார்கழி மாதம் ஆலயத்தில் மட்டுமின்றி வீட்டிலும் திருவெம்பாவை படித்தால் தடைகள் நீங்கி உடனே திருமண யோகம் கைகூடி வரும் என்பது ஐதீகமாகும்.

மார்கழி மாதத்தில் அதிகாலை பிரம்ம முகூர்த்த நேரத்தில் பஞ்ச பூத வாயு சக்தியான பரிசுத்தமான காற்று பூமி எங்கும் நிரம்பி இருக்கும். அந்த காற்றை சுவாசித்தால் நரம்புகள் தூண்டப்பட்டு ரத்த ஓட்டம் சீராகும். உடம்பில் புத்துணர்ச்சி கிடைக்கும். அறிவியல் ரீதியான இந்த பலனை பெறவே மார்கழி மாதம் அதிகாலையில் ஆலயத்துக்கு சென்று திருப்பாவை, திருவெம்பாவை படிக்கும்படி நமது முன்னோர்கள் வரையறுத்து வைத்துள்ளனர்.

மார்கழி மாத ஆருத்ரா தரிசன நிகழ்ச்சியின் பின்னணியில் ஒரு வரலாறு உள்ளது. தாருகாவனம் என்ற வனத்தில் தவ வலிமைமிக்க முனிவர்கள் இருந்தனர். அவர்களுக்கு சிவபெருமான் மீதான ஈடுபாடு ஒரு காலத்தில் குறைந்தது. எல்லாமே கர்மா அடிப்படையில் நடப்பதாக சொன்னார்கள். இதையடுத்து அவர்களுக்கு சிவபெருமான் மீதான பற்றுதலை ஏற்படுத்த ஈசனே ஒரு திருவிளையாடல் நடத்தினார்.

தாருகாவனத்துக்குள் அவர் பிச்சாடனர் (பிச்சை எடுப்பவர்) வேடம் ஏற்று சென்றார். அவரது அழகில் முனிவர்களின் மனைவிகள் மயங்கினார்கள். பிச்சாடனர் பின்னாலே சென்றனர். இதைக்கண்டு முனிவர்களுக்கு கோபம் வந்தது. அவர்கள் ஹோமம் வளர்த்து அதிலிருந்து புலி, மதயானை, அக்னி, உடுக்கை, மான், முயலகன் போன்றவைகளை வரவழைத்து பிச்சாடனர் மீது ஏவினார்கள். ஆனால் அவை அனைத்தையும் சிவபெருமான் தமது உடமைகளாக மாற்றிக் கொண்டார். மதயானையை கொன்று அதன் தோலை உரித்தி ஆடையாக உடுத்திக்கொண்டார். முயலகன் மீது வலது காலை ஊன்றி இடது காலை தூக்கி நடனமாடினார்.

முனிவர்களுக்கு புத்தி புகட்டும் வகையில் தனது சடைகள் எட்டு திசைக்கும் விரிந்து ஆடும் வகையில் அண்டங்கள் எல்லாம் குலுங்க தாண்டவம் ஆடினார்.
அதை கண்ட பிறகே பிச்சாடனர் உருவத்தில் வந்தது சிவபெருமான் என்பதை உணர்ந்து முனிவர்கள் தங்களது தவறை உணர்ந்தனர். தாங்கள் செய்த குற்றத்தை பொறுத்து அருள வேண்டும் என்று சிவபெருமானிடம் வேண்டினார்கள்.

அதை ஏற்றுக் கொண்ட சிவபெருமான் தன்னுடைய ருத்ர தாண்டவத்தை மாற்றி ஆனந்த தாண்டவமாக ஆடினார். அந்த ஆனந்த தாண்டவம்தான் ஒவ்வொரு ஆண்டும் ஆருத்ரா தரிசன தினத்தன்று நடத்தி காட்டப்படுகிறது. அன்றைய தினம் சிவபெருமானுக்கு களி நிவேதனம் செய்வார்கள்.

களி நிவேதனம் செய்து வழிபட்டால் செல்வம் பெருகும். மன அமைதி உண்டாகும். சிவன் அருள் கிடைக்கும் என்பது ஐதீகமாகும்.ஆருத்ரா தரிசனத்தன்று விரதம் இருப்பது மிகவும் நல்லது. சிலர் ஆருத்ரா தரிசனத்திற்கான 10 நாட்களும் விரதம் இருப்பதுண்டு.

மார்கழி மாதத்தில் கடைபிடிக்கப்படும் இந்த விரதத்திற்கு மேன்மை தரும் வகையில் திருவெம்பாவை பாடல்கள் அமைந்துள்ளன. சிவனுக்கு தொண்டு புரிவதையே வரமாக சொல்கிறது திருவெம்பாவை. பெண்கள் நோன்பு இருக்க செல்லும் போது தூங்குபவளை எழுப்பும் காட்சியும் திருவெம்பாவையில் உள்ளது.

சிவனின் பெருமையை திருவெம்பாவை பாடலில் உணர முடியும். அண்ணாமலையாரின் திருவடி சிறப்பை திருவெம்பாவையின் கடைசி பாடலில் மாணிக்கவாசகர் குறிப்பிட்டுள்ளார்.

சிவபெருமானின் திருவடிகளே உலகத்திற்கு முதலும், முடிவுமாக உள்ளது என்றும், அவை ஐந்தொழில்களை ஆற்றுகின்றன என்பதையும் திருவெம்பாவை பாடல்கள் சூட்டிகாட்டுகின்றன. எனவே இந்த மார்கழி மாதம் திருவண்ணாமலை தலத்திற்கு சென்று அண்ணாமலையாரை வழிபட்டு ஆருத்ரா தரிசனம்- திருவெம்பாவை விழாவில் கலந்து கொண்டால் அளவற்ற பலன்களை பெறலாம்.

ஆண்டுதோறும் மார்கழி மாதத்தில் வரும் சிவபெருமானின் சிறப்பு நட்சத்திரமான திருவாதிரை நட்சத்திரத்தில் அனைத்து சிவன் கோவில்களிலும் ஆருத்ரா தரிசன நிகழ்ச்சி நடைபெறும். திருச்சியில் மலைக்கோட்டை தாயுமானசுவாமி கோவிலில் ஆருத்ரா தரிசன நிகழ்ச்சி நாளை தொடங்கி 2 நாட்கள் நடக்கிறது.

இதனையொட்டி நாளை தாயுமானசுவாமி கோவிலில் உள்ள நூற்றுக்கால் மண்டபத்தில் நடராஜர்-சிவகாமசுந்தரி மற்றும் விநாயகர், சுப்பிரமணியர், வள்ளி-தெய்வானை, சண்டிகேஸ்வரர் ஆகிய சுவாமிகளுக்கு விபூதி, பால், தயிர், சந்தனம் உள்ளிட்ட பல்வேறு வகையான அபிஷேகம் நடக்கிறது.

தொடர்ந்து நாளை மறுநாள்(ஞாயிற்றுக்கிழமை) காலை சுவாமிகளுக்கு புஷ்பஅபிஷேகம் செய்து, தீபாராதனை காண்பிக்கப்படுகிறது. அதன்பிறகு சுவாமிகள் திருவீதி உலா நடைபெறும். இதேபோல் திருச்சியில் உள்ள திருவானைக்காவல் ஜம்புகேஸ்வரர் அகிலாண்டேஸ்வரி கோவில், உறையூர் பஞ்சவர்ணசாமி கோவில் உள்பட அனைத்து சிவன் கோவில்களிலும் ஆருத்ரா தரிசன நிகழ்ச்சி நடைபெறுகிறது. இதற்கான ஏற்பாடுகளை கோவில் நிர்வாகத்தினர் செய்து வருகிறார்கள். 

சிதம்பரத்தில் உலக புகழ்பெற்ற நடராஜர் கோவில் உள்ளது. இந்த கோவிலில் ஆண்டுதோறும் ஆனி மாதம் ஆனி திருமஞ்சனமும், மார்கழி மாதம் ஆருத்ரா தரிசனமும் வெகு விமரிசையாக கொண்டாடப்படுகிறது.

அதன்படி இந்த ஆண்டுக்கான மார்கழி மாத ஆருத்ரா தரிசன விழா இன்று(வெள்ளிக்கிழமை) கொடியேற்றத்துடன் தொடங்கியது. இதையொட்டி அதிகாலையில் கோவில் நடை திறக்கப்பட்டு நடராஜருக்கும், சிவகாமசுந்தரி அம்பாளுக்கும் சிறப்பு அபிஷேகம் நடந்தது. அதனை தொடர்ந்து பஞ்சமூர்த்திகள் சிறப்பு அலங்காரத்தில் பக்தர்களுக்கு காட்சி அளித்தனர். தொடர்ந்து காலை 8.30 மணி முதல் 9.30 மணிக்குள் நடராஜர் சன்னதி எதிரே உள்ள கொடிமரத்தில் கொடியேற்றப்பட்டது. இரவு தங்கம், வெள்ளி வாகனங்களில் பஞ்சமூர்த்திகள் வீதிஉலா நடக்கிறது.

விழாவின் முக்கிய நிகழ்ச்சிகளில் ஒன்றான தேரோட்டம் வருகிற 22-ந் தேதி (சனிக்கிழமை) நடக்கிறது. அன்றைய தினம் அதிகாலை 5 மணிக்கு மேல் நடராஜர், சிவகாமசுந்தரி, விநாயகர், சுப்பிரமணியர், சண்டிகேஸ்வரர் ஆகிய சாமிகள் தனித்தனி தேரில் எழுந்தருளி தேரோட்டம் நடக்கிறது.

சிகர நிகழ்ச்சியான ஆருத்ரா தரிசனம் 23-ந் தேதி (ஞாயிற்றுக்கிழமை) நடக்கிறது. இதனையொட்டி அன்று அதிகாலை 3 மணி முதல் 6 மணி வரை ஆயிரங்கால் முகப்பு மண்டபத்தில் சிவகாமசுந்தரி அம்பாளுக்கும், நடராஜருக்கும் மகாஅபிஷேகம் நடக்கிறது.

பின்னர் காலை 6 மணி முதல் 10 மணிவரை திருவாபரண அலங்காரமும், சித்சபையில் ரகசிய பூஜை, பஞ்சமூர்த்திகள் வீதிஉலா காட்சியும், 1 மணிக்கு மேல் ஆருத்ரா தரிசனமும் நடக்கிறது. 24-ந் தேதி பஞ்சமூர்த்திகள் முத்துப்பல்லக்கில் வீதிஉலா நடக்கிறது.

இதற்கான ஏற்பாடுகளை பொதுதீட்சிதர்கள் செய்து வருகின்றனர்.

இறைவனது தரிசனம் பார்த்தால் எடுத்த பிறவிக்கும் பலன் கிடைக்கும். அடுத்தடுத்து வரும் சம்பவங்களும் அனுகூலமாகவே நடைபெறும். “கொடுத்து வைத்தவர்கள் நீங்கள்” என்று ஒருசிலரை வர்ணிப்பது வழக்கம். அவர்களெல்லாம் இறைவனது தரிசனம் பார்த்து தகுந்த வாழ்க்கையை அமைத்துக் கொண்டவராக இருப்பர்.

அந்த அடிப்படையில் நடராஜர் தரிசனம் கொடுப்பது வருடத்திற்கு இரண்டு முறையாகும். ஒன்று ஆனித் திருமஞ்சனம், அடுத்தது மார்கழித் தரிசனம். இந்த ஆருத்ரா தரிசனம் மார்கழி மாதம் 8-ந் தேதி ஞாயிற்றுக்கிழமை (23.12.2018) வருகின்றது. அன்றைய தினம் நடராஜர் சன்னிதியில் சிவபுராணம் பாடி மனமுருகி வழிபட்டால் ஆடலரசன் அருளால் அகிலம் போற்றும் வாழ்வு அமையும்.

சிதம்பரத்தில் உலக புகழ்பெற்ற நடராஜர் கோவில் உள்ளது. இந்த கோவிலில் ஆண்டுதோறும் ஆனி மாதம் ஆனி திருமஞ்சனமும், மார்கழி மாதம் ஆருத்ரா தரிசனமும் வெகு விமரிசையாக கொண்டாடப்படுகிறது. இந்த 2 திருவிழாக்களின் போதும் மூலவரே உற்சவராக வலம் வந்து பக்தர்களுக்கு அருள்பாலிப்பது சிறப்பாகும்.

அதன்படி இந்த ஆண்டுக்கான மார்கழி மாத ஆருத்ரா தரிசனவிழா வருகிற 14-ந்தேதி காலை கொடியேற்றத்துடன் தொடங்குகிறது. இதனையொட்டி அன்று அதிகாலையில் கோவில் நடை திறக்கப்பட்டு நடராஜருக்கும், சிவகாமசுந்தரி அம்பாளுக்கும் சிறப்பு அபிஷேகம் நடக்கிறது. அதனை தொடர்ந்து பஞ்சமூர்த்திகள் சிறப்பு அலங்காரத்தில் பக்தர்களுக்கு காட்சி அளிக்கின்றனர். தொடர்ந்து காலை 8.30 மணி முதல் 9.30 மணிக்குள் நடராஜர் சன்னதி எதிரே உள்ள கொடிமரத்தில் கொடியேற்றப்படுகிறது. இரவு தங்கம், வெள்ளி வாகனங்களில் பஞ்சமூர்த்திகள் வீதிஉலா நடக்கிறது.

தொடர்ந்து 15-ந்தேதியில் இருந்து 21-ந்தேதி வரை தினமும் காலை பஞ்சமூர்த்திகள் வீதிஉலாவும், இரவில் பல்வேறு வாகனங்களில் சாமி வீதிஉலாவும் நடைபெற உள்ளது.

விழாவில் முக்கிய நிகழ்ச்சிகளின் ஒன்றான தேரோட்டம் வருகிற 22-ந்தேதி(சனிக்கிழமை) நடக்கிறது. அன்றைய தினம் அதிகாலை 5 மணிக்கு மேல் நடராஜர், சிவகாமசுந்தரி, விநாயகர், சுப்பிரமணியர், சண்டிகேஸ்வரர் ஆகிய சாமிகள் தனித்தனி தேரில் எழுந்தருளி தேரோட்டம் நடக்கிறது.

சிகர நிகழ்ச்சியான ஆருத்ரா தரிசனம் 23-ந்தேதி(ஞாயிற்றுக்கிழமை) நடக்கிறது. இதனையொட்டி அன்று அதிகாலை 3 மணி முதல் 6 மணிவரை ஆயிரங்கால் முன் முகப்பு மண்டபத்தில் சிவகாமசுந்தரி அம்பாளுக்கும், நடராஜருக்கும் மகாஅபிஷேகம் நடைபெறும். பின்னர் காலை 6 மணி முதல் 10 மணிவரை திருவாபரண அலங்காரமும், சித்சபையில் ரகசிய பூஜை, பஞ்சமூர்த்திகள் வீதிஉலா காட்சியும், 1 மணிக்கு மேல் ஆருத்ரா தரிசனமும் நடக்கிறது. 24-ந்தேதி பஞ்சமூர்த்திகள் முத்துப்பல்லக்கில் வீதிஉலா நடக்கிறது. இதற்கான ஏற்பாடுகளை பொதுதீட்சிதர்கள் செய்து வருகின்றனர்.

விழாவையொட்டி கோவில் கிழக்கு கோபுர வாசலில் பந்தல் போடும் பணி நடைபெற்று வருகிறது.